Bûyerpress
Sultan Temo
Eger em li ser dîroka bav û kalên kurdan lêhûrbîniyekê bikin, em ê baş baş û zelal bibînin ku dema herî zêrîn û bihêz, a serdema konfederaliya Medya ye. Ji medan û vir ve her çiqasî gelê kurd di demên cihê de mîrnişîn û xanedan ava kiribin jî, lê tu carî mîna Medya fireh, zengîn û bi wate nebûne. Li Mezopotamyayê Imperatoriya Aşûr sembola zulm, zor û sîtemkariyê bû; ewê imperatoriyê vîna gelên med, pers û babiliyan çewisandibû, pir sîtemkar û xwînxwer bû. Di wê serdemê de medan pêşengtiya serhildan û raperîna li hember kedxwarî û dagirkeriyê kiribû. Ewê serhildanê hêza xwe ji mîratê Diyako yê rêxistinî û ji felsefeya Zeradeşt a aşîtîxwaz û azadîxwaz digirt, her wiha xwe dispart biratiya gelên pers û babilan.
Her çi qas ev konfederaliya med, pers û babilan bi serbaziya medan jî be, lê gelên din ên Mezopotamyayê sûd jê girtin û ji sîtemkariya Impertoriya Aşûr azad bûn. Gelên Medya bi hişmendiya felsefeya Zeradeşt a durist û rasteqîn nêzî gelên hevpar ên axa Medya dibûn, lê belê herdu gelên din bi heman hişmendiyê nêz nedibûn; bi taybet persan xap û lîstok rîstin, ji bo hilweşandin konfederaliya Medyayê.
Dîrok tu carî xwe dubare nake, lê belê gelek caran dîrok di pêvajoyên wekhev re derbas dibe. Ji ber vê yekê bê çawa naverok û cewherê felsefeya Zeradeşt di pirtûka pîroz a Avesta de bû sedema azadiya gelên Medya, îro jî şehîda rûmetê Avesta xabûr bi hişmendiya jina azad û bi hişmendiya aşîtî û biratiya gelan, li hember hovîtiya toraniya osmaniyên nûjen û sextekariya pêxwasên çolan, bi biryar, fedekarî û lehengî bû sembola serhildan û azadiya jinê û gelên bindest.
Di roja îro de dewleta Tirk (osmaniyên nûjen) di laşê Rojhilata Navîn de nexweşiya penceşêrê ye; vîn û azadiya gelên kurd û ereb nas nake, bi hemû rengên kedxwarî, bêbextî, zor û çewisandinê êrîşî nimûneya jiyana hevbeş, aşîtîxwaz û azadîxwaz a gelan dike. Li Efrînê weke çawa berî wê li Koban û Serê Kaniyê, aniha berxwadana ronahî li hember tariyê, berxwedana azadî û biratiyê li hember binestî û faşîzmê li dar e. Carekê di dîrokê de li Medya felsefeya Zeradeşt bi pirtûka Avestayê azadî ji bav û kalên kurdan re anî û bû destpêka rojeke nû “Newroz”, roja xweşî û buhara gelan li Mezopotamyayê. Îro dîsa li ser heman xakê, li ser xaka sembola aşîtiyê “dara zeytûnê” li Efrînê; zarokên agir û rojê, hilgir û parêzvanên felsefeya Zeradeşt bi biryar û qehremaniya Avestayan li hember olperestên hov û şovenîzma netewperestî û paşverûtiyê li ber xwe didin. Bi xwîna xwe ya zelal û pîroz mîna tîrêjên rojê, rêka azadî û serkeftinê ji gelên mezopotamya re xêz dikin û soza rojeke nû, Newrozeke nû, jiyaneke azad û pêşerojeke şahnaz dane.
Bê guman çawa li Medya azadî, aşîtî û biratiya gelan di sîwana felsefeya Zeradeşt de bi ser keft, îro bi sedhezaran Avesta û Barîn li ser heman şop û hişmendiyê dê ji gelên me re serkeftin û azadiyê û ji bindestî û kedxwariyê re mirinê bînin.
Nivîsên ku tên weşandin, nerînên xudanên xwe ne.
Ev nivîs di rojnameya Bûyerpress, hejmara 76′ê de hatiye weşandin. 2018.3.15