Azad..A.Z.X
( Ji Bo Azadkirina Mirovê Kurd)
Romantîkî:Bi wateya sawêrî, aşopî ( Xeyalî ),nimûneyî , mînaketî, hest û ramanên ne girêdayî bi jiyana riyalîzmê ve ye.
Wekî mirov ji xwe re hest bi jiyaneke aşopî, xeyalî û dûrî rewşa mirov tê de dijî bike, wekî mirov, mirovahiya xwe di jiyaneke romantîkî de bibîne.
Wekî mirov her demî hest bi hişkbûna jîwar û riyalîzma mirov tê de dijî bike. Wekî nedadweriya civakî, çavnebariya mirovên wê, nezanîna mirovên wê.
Bênewazî û nenazikbûna wan, paşketina wan, pêşketina wan ber bi nazikbûn û mirovahiyê ve ne diyar be. Şer û pevçûn, û şermezarî diyardeya rojane be. Nearamiya wê, şermezarkirina evînê, ziwakirina hestan.
Wekî mirovê hestnazik, hestyar, evîndar û rewşenbîr li azadiya xwe bigere, di jiyaneke romantîkî de, di riyalîzmeke nû de. Anku mirovên riyalîzma ew tê de, ber bi hovbûnê ve diçin. Lê mirovên jiyana romantîkî ber bi mirovahiyê ve diçin. Anku riyalîzma wan guhêrbar e. Di vir de wateya romantîkiyê ron û diyar dibe.
Civaka mirovên romantîkî bi hêvîdarî dijîn, mirovên wê geşbîn in, li zanînê digerin.
Dema xwe bêhûde û vale derbas nakin, anku dixwînin, dinivîsin.
Bihayê zanînê li ba wan pîroz e, bilind dinirxînin. Mûzîk û awaz li ba wan nirixdar e. Lê guhdarî dikin, bihîstina mûzîk û awazan dermanê derûna xwe dizanin û xwarina canê xwe dibînin.
Rewişt û sinciyên mirov li ba wan pîrozdar in, bi taybet bihabûna keç û jinê.
Mafên mirovan bi rêzgirtin diparêzin, roj bi roj mirovên civaka romantîkî nazik dibin, pêş dikevin, mihrevan dibin, alîkariya hev dikin.
Her kes bi erkê xwe radibe. Spehîbûna her tiştî ber bi hêjabûnê ve bilind dikin.
A ji her tiştî bihatir û giringtir li ba civaka romantîkî EVÎN e.
Evînê wekî ronahî dibînin, bi lêkolînên zanistî li rastiya evînê digerin.
Bi awayekî zanistî, bi felsefî, ol û baweriyên xwe şîrove dikin.
Bi pakbûna dil û canê xwe nêzî Xweda dibin. Bi qanûnên mirovahî tev digerin, anku bi bîr û baweriyên wijdan, ji pakbûna dilên xwe dest pê dikin.
Bo nimûne, bi xêrxwestina di mirovan de ji yaseyên derûna xwe biryar didin.
Xudanê şêwazekî bi rêz in, sînûrên rûmeta xwe dizanin. Azadiya kesane ji azadiya ku Xweda dabû wan didin nasîn.
Azadiyê bi mafên mirov pesend dikin.
Civaka klasîkî:
Nimûne, mirovên kilasîkî ji bedewbûna jiyanê têr nabin. Dixwazin her demî serdema wan neyête guhertin, anku sirûşta riyalîzma xwe ji guherînan diparêzin.
Her tiştên jiyana xwe bilind dinirxînin.
Ji aramî û aştiya xwe dilxweş in.Dîmenên jîngeha xwe bi xweşikbûn û şîwazên kevneşopî ava dikin, ji zanistên serdem ên berî xwe, pê civaka xwe nazik û zane dikin,hestyar dikin, mihrevan dikin, nêzî hev dikin.
Di riyalîzma kilasîkî de, xwe azad dibînin.
Evîn, zanîn û mûzîkê mîna hev bihadar dibînin, di terazûya jiyana xwe ya kilasîk de.
Civaka Kurdî:
Nimûne, civaka Kurdî ne civakeke romantîkî ye; ne jî kilasîkî ye, mixabin sed mixabin.
Civaka Kurdî civakeke rawazperest e, kevneperest e. Mirovên Kurdî bi piranî çavlêker in, çav li hev dikin didin dû hev, çav li çandên biyanî dikin, bihayê xwe winda dikin.
Bandora dijmin li ser civaka Kurdî zal bûye. Mirovên Kurd dîl in, hest û ramanên wan ne azad in, li azadiya xwe nagerin.
Didin li pey xweşiya jiyanê, dev ji bihabûna netewe û welatê xwe zû berdidin. Ji dîmen û temtêla jiyanê hez dikin, ji gewher û naveroka jiyanê hez nakin.
Ji reng û dengvedana zanînê hez dikin, ji gewher û bihabûna zanînê hez nakin.
Ey mirovê Kurd bibe romantîkî, zimanê xwe bixwîne, hêvîdar bibe, azad bibe û li mirovahiya xwe vegere, welatê te mirovahiya te ya zana û serbilind dixwaze.
Bihayê xwe bizane, bihayê te zanîn e.
Dilnewaz bibe, hestyar bibe, nazik bibe ber bi welat ve, ber bi mirovahiyê ve, ber bi romantîkiyê ve.
Bila baweriya te bi romantîkiyê bê, azadiyê bê , serkeftina hêviyên mezin bê.
Rewş dê bête guhertin, ey mirovê Kurd, ey civaka kurd…
Romantîkî: Guhertina riyalîzmê ye, bazdan û reva jê ye.
Romantîkî: Serrastkirina bîr û baweriyên şaş ên mirov û civakê ye, ku hişmendiya xwe pê saz kirine.
Romantîkî: Hêvîdarî û nazikî ye, dijberî rawazperestî, kevneperestî û çavlêkirina şaş û ziyandar e.
Romantîkî: Çareserî ye, da ku takekes erkê mirovahiya xwe, bi azadî rabe.Karê ji wî tê xwestin, anku ji gewher û kakilê mirovahiya wî, ji dil û wijdanê wî.
Romantîkî: Pirensîp e, riya zanistê ye, ji bo rizgarkirina mirovan, ji rawazperestiyê, hovîtiyê, paşketinê û rotîna bêdawî. Anku Romantîkî wergerîn e ( Inqîlab e), li ser serdema kilasîkî (kevneşopî ).
Romantîkî tenê dikare, dîktatoriya civakî hilweşîne. Romantîkî rewişt û sinciyên mirovan diparêze û bihayê wan bi azadî dinirxîne.
Em diketîne demekê de pêwîst e, jiyan û riyalîzma me bibe Romantîkî, aştî, nazikî, mihrevanî…ji ber ku her tişt tevlîhev bûye, başî, nebaşî û kesên çakîxwaz û kesên bedkar….
Di baweriya min de bîr û baweriyên civaka Kurdî bi piranî şaş in. Hêza civaka sivîl a mirovên Kurd lawaz e.
Asta rewşenbîriya wî di aliyê zanistê de, ber bi jêr de ye. Ev tev encamên bîr û baweriyên şaş ên mirovên Kurd in ku hişmendiya xwe ji mêj de pê saz kirine….
Bang bo Romantîkiyê, da ku em di vê jiyanê de, hest bi mihrevaniyê bikin…..
Ev nivîs di rojnameya Bûyerpress, hejmara 67′an de hatiye weşandin 15.10.2017
