Pêşmerge Me. . . . . .
Bi hêz im bi rêz im
Bi halan û hêrz im
Welat di parêz im
Pêşmerge me. . . . . .
Bi cerg im diwêrim
Wekû baz û şêr im
Ez dijmin di hêrim
Pêşmerge me. . . . . .
pêgavan davêjim
Xwîna xwe dirêjim
Sirûdan dibêjim
Pêşmerge me. . . . . .
Li banî dinêrim
Tîrêj û sitêr im
Erkan na jimêrim
Pêşmerge me. . . . . .
Çekdar im haydar im
Kujarê neyar im
Li şer arê har im
Pêşmerge me. . . . . .
Mirinê nasnakim
Çimkî rewanpak im
Ez goriyê xak im
Pêşmerge me. . . . . .
Her dem ez şiyar im
Leheng û dijwar im
Li şer tûj û har im
Pêşmerge me. . . . . .
Ez azadîxwaz im
Serbest û şanaz im
Bi ol û rêbaz im
Pêşmerge me. . . . . .
Bi çek im bi rext im
Xwedan tor û bext im
Bi al û paytext im
Pêşmerge me. . . . . .
Nabezim narevim
Ji rê dernakevim
Divê bi ser kevim
Pêşmerge me. . . . . .
ji dijmin natirsim
Ez bi tûnd û qurs im
Li welat dipirsim
Pêşmerge me. . . . . .
Lawê kurdistan im
Ez bê rawestan im
Bi xwe dibistan im
Pêşmerge me. . . . . .
Kurd im têkoşer im
Her dem şoreşger im
Bergir û rêber im
Pêşmerge me. . . . . .
Navê min pîroz e
Li nik êl û hoz e
Cejna min newroz e
Pêşmerge me. . . . . .
Qamişlo – 27. 07. 2014
Meyger
Masa me li ber me ye
kasa me bidest me ye
Em dê meyê bi noşin
Şahî û cejna me ye
Meyger kasê dagire
Bibûr li me negire
Em va mest û serxoş in
Sema li bendî me ye
Hildin kasa hevala
Ya kulîlk û şemala
Em bi can û bi hoşin
Cîhan ne hember me ye
Meyger me’dê xwe meke
Me dê û bav her yeke
Em buhiştê difiroşin
Par ji dojê me he ye
Meyger bêne tembûrê
Da saz bikim rê dûrê
Em bi bext û qidoşin
Kêfxweşî mafê me ye
Em bi meyê nabin gêj
Ne dilmij û ne xwînrêj
Em dilşad û serxoş in
Balaçûn rêça me ye
Meyger şûşa min veke
Xweşik û sayî seke
Em dê reha bi doşin
Ger bişkê jê tune ye
Qamişlo 20 -11-1990
Yara dilber
Xwîs û keser
şor û xeber
di qirikê de (sekinî)
Kul û keder
wekû bîber
di canê min de dijenî
Roja lider
sipî û zer
tu car bimin re ne kenî
Yara dilber
deng li herder
nav ji bîr nabe ji binî
Ezim perwer
bilav û şer
dijî pîs û zinx û genî
Lêvên şekir
memik û ber
tîm e, wey li min rebenî !
Evîn bê cir
awir quncir
dilê min kir pêt û tenî
Min dît jider
vekir pencer
mingot: bi soz tu ya minî
Qamişlo – 24/11/1984
Bere Bêne Bîra Te
Gava min dest dida te
Bext û dil hatin ba te
Bo te diçûm civata
Bere bêne bîra te
Li ser te ser xweş bûm
Bi te pir gur û geş bûm
Her çaxî anî beş bûm
Bere bêne bîra te
Navê te ser ziman bû
Rewan bo te arzan bû
Li ba min tu ciwan bû
Min digot: bi te felat e
Xwezka te dêm bi şişte
Te Hindur jî bi malişte
Li ber neynikê rûnişte
Ji nû tu çûba xebata
Roja çû qet venagerê
Tu car nayêm wek berê
Nema dixum wê serê
Yê te xwest wa giha te
Birîna min dijwar e
Min gazî û hawar e
Dermana nekir çar e
Ber bêne bîra te
Te biyan û jar kirim
Ji hogira dûr kirim
Nîq û viran gêr kirim
Mirovim dil nelat e
Ez û baranê yar in
Em jiyanê dibarin
Em bi agir dikarin
Dana me wek ferat e
Ji felekê na tirsim
Bi zanistî dipirsim
Li dîrokê û dêrsim
Xwezî ew dem bi hate
Hew dikim dil paqijî
Hew dixum nanê rijî
Bi xap û hevalkujî
Ji destê malmîreta
Bide min soz û peyman
Bêje: ez şaş û poşman
Binivîse li her eywan
Hingî ezê bêm ba te
Pelekî nû dê vekim
Çavsoriyê pê çekim
Dîsa xwe gorî tekim
Hingî kar û xebat e
Tertus -17. 3. 1989
Dermanê Te Maliştine
Ey hevalê sala pengî
Tu bi navî, pir bi dengî
Bi kirasê hezar rengî
Tu xweş dostê bihna tengî
Bi hawar û bez û cengî
Ji mitalêre tu lehengî
Bi pêçanê tu çek tengî
li bazara baş bi bengî
Qaşo ! li cejna bi şengî
Bawerke tu ne tu tiştî
Tu neyar û giranpiştî
Tu destgerî, hîz û pûştî
Bi hesanî tu tê kirîn
Tu fişikan dike bi xwîn
Tu jehr dikî her hilm û jîn
Tu her cihî dikî dûman
Tu reş dikî hiş û goman
Tu mêrxasa dikî coran
Bêna devan tu dikî pîs
Dûman ji te dibe werîs
Tu xercdikî tûr dûv telîs
Kesan dikî parsek û qels
Ser te dibe derew û bels
Hêrz û hiner tev dibin mels
Tu zikê têr dikî birçî
Tu ziwayî, tehlî û pûçî
Gemardevî, qelêrpêçî
Tu ardûwê giş dibe dû
Diçilmisin her çav û rû
Xelîtk diçin birîk li dû
Abora gel dibe wêran
Tu nahilî xwê û arvan
Rûmet bi te dibe arzan
Peyde dikî jan û êşan
Semax dibe gunhê pîsan
Kurmik dibe mereqa can
(Qût)ê malan tu dikî talan
Ger tu nebî, şer û lêdan
Ger tu nebî, tune razan
Ey dostê lûl û pîpîka
Nema te dikim birîka
Nema zerdikim tilîka
Nema ez li te digerim
Bi qirûşkî te na kerim
Bi zanistî venagerim
Ey dijmê ol û jîna
Cansaxî li te bi kîne
Soz û bextê te tu nîne
Agir û pêt li dûv tene
Çepel û derd şanê tene
Kesê bi tere ne ji min e
Kurmikê te gelek pîs e
Yek pey yekê, dibê dîse
Bêdawiye Rotîn rîs e
Navê te bi xwe tûtine
Dostaniya te kuştine
Dermanê te maliştine
Tertûs-13/03/1989
Biyan im
Li vê çerxê û vê çaxê
Bû we cihê xem û daxê
Ez biyanbûm li vê taxê
Ez bê par mam ji çeraxê
Çandî bûm li vê miştaxê
Niştecî bûm li peraxê
Navdar bûm ez li vê kaxê
Lê mam dîlê ax û waxê
Ez ciyawaz bûm vê carê
Wekû bikevim ji darê
Zîvirîm malê vê xarê
Çimkî ne nasbûn yên tarê
Seyr û mat bûm vê êvarê
Hest û hiş çûne bêmarê
Zar û ziman dibên: jarê
Hêstir ji çavan tên xwarê
Şensê pîse,ku mam li vir
Bextê reşe,qend bû kevir
Rûwên tal û tirş û zivir
Di laş de bûn tîr û bivir
Hevjînî bûwe komek vir
Divê ez bar bikin ji vir
Pêxwas bûne xwedî hevir
Fêkî bûne sîr û tivir
Resen û qenc çikiyan e
Dost û hogir ne xuyan e
Silav li dizan ziyan e
Xwedanê şan û riyan e
Mîrê cengê bi halan e
Akam,azar û wêran e
Şaxê wî li her ciyan e
Dirav,mebest û înan e
Li vegerê mam behitî
Hiş ji serê min şemitî
Dil şewitî..cerg peritî
Dev qul nebû.. ne şehitî
Ji rewşa pîs û(lewitî)!
Por weşiya.. pêst qemitî
Xwezî bi cavê şelbitî
Ne korbûna hitm û petî!
Em û dijmin tevlî hevin
Em û xwedî dûrî hevin
Derdê giran: em ne levin
Em sed dest û hezar dev in
Hevwelatî ji war di revin
Kesê mayî bi gerev in
Rojê wana hemî şev in
Xort ji tirsa dernakevin
Em saxin, lê em mirîne!
Karê me şîn û girîne
Mal jî tirbê vekirîne
Sar û ziwa û tarîne
Rêvebirê me terîne
Bê sazan û bê serîne
Xelkê ew arzan kirîne
Poz û zarê wan birîne
Bê revim derwaz girtîne
Têperên sînor kuştîne
Xelk berçîne yan jî tîne
Sûcdarê mezin partîne
Ji çekdaran em xwestîne
Bi pêdawîstan pestîne
Em bi tirsê hêvaztîne
Bi sa xwedê parastîne
Mehfûzê mele silêman
Qamişlo – 27.06.2016
Ev Helbestin Bijartî di hejmara 50′î de, ya rojnameya Bûyerpress de hatiye weşandin 1/9/2016
