Dilawerê Zengî
Serî hildin, ji gorê tev temaşakin perînaz î
Li ezmanê Mehabadê firî bala, bi çengbaz î
Perî û bask, li jêr û jor, dikî perwaz keça kurd î
Xetîra roj seranser girt şeva tarî hila find î
Li Kurdistan te ronî kir, çirîska rojhilata min
Nema xew tê, hilavêtim, şiyar bûm ez xelata min
Vejînim agirê Kawa, li hevrêzên çiyayê tû
Ku pêxember Zeradeştê Evesta girt ji tayê tû
Li ser ola te candar in, bi halana kurên Qazî
Bi rêbaza rewanpakan, bi hawara Ferînazî
Xudanrûmet, keça bavî,bi sincî pa û şêrnêr î
Ji destên wan kurên dêlik, gihakêş in, ne serjêr î
Perînazê, li Kurdistan, bi xemla zer ciwanbûk î
Bi alaya zerê Mîtan, bejinbalan ji nû nû kî
Cil û berên hevirmêşî serî taca Şerefxan î
Buhişta sermedî Îrem, ji nîgara te lê danî
Qeşenga min xudanaz î, tu dotmîra gulîzar î
Di dil min da, rehê şaxan hezar gul dan, tu jîndar î
Mirin jîn da kesên paqij, riya rûmet, bi comerd î
Ferînazê, li Qamişlo, bi rojbûna xwe pamend î.
