YPGê ragihand, li herêmên Kobanî û Til Temirê yên Rojavayê Kurdistanê 37 çekdarên DAIŞê hatin kuştin.
YPGê derbarê şer û pevçûnên 24 saetên borî yên li Kobanî û Til Temir de daxuyaniyek weşand. Di daxuyaniyê de hat gotin ku şeva borî çekdarên DAIŞê êrişî gundê Til Bazê, ku dikeve navbera Til Temir û Hesekê, kirin lê rastî bersiva şervanan hatin.
Hat gotin ku di wî şerî de 8 çekdar hatine kuştin û 4 jî birîndar bûne.
Çekdarên DAIŞê her wiha duh êrişî gundê Til Nesrî yê rojavayê Til Temir kirin lê li wir jî şervanan bersivan û di encamê de 5 çekdar hatin kuştin, 2 jî birîndar bûn.
Di daxuyaniyê de li ser şerê herêma Kobanî hat gotin ku êrişên DAIŞê yên ku li hemberî gund û deverên derdora Qereqozaxê li başûr rojavayê Kobanî hatibûn destpêkirina, duh tevahiya rojê berdewam kirin. Piştî pevçunên dijwar hemû êriş hatin şikandin.
Li gorî YPGê, di wî şerî de 24 çekdar hatin kuştin ku 13 kuştiyên DAIŞê ketin destê YPGê her wiha şervanan dest danîn ser hinek çek û cebilxane
Rûdaw