Kantona Kobanê Enwer Mislim ragihand ku roja 2-3’yê Gulanê wê têkildarî xebatên ji nû ve avakirina Kobanê li Amedê konferansek bê lidarxistin.
Biryara konferansê di civîna çapemeniyê ya li ber avahiya hikûmetê ya Kantona Kobanê bi beşdariya Hevserokê Kantona Kobanê Enwer Mislim û Hevşaredarê Bajarê Mezin ê Amedê Firat Anli hate lidarxistin de hate dayin.
Di kongireya rojnamevanî de hevserokê Kantona Kobanê Enwer Mislim têkildarî êrîşên li hemberî kantonê û berxwedana Kobanê agahî da û piştre diyar kir ku di encama êrîşan de ji sedî 80’yê bajêr hilweşiyaye û ev yek jî şert û mercên jiyanê gelek zortir dike. Muslim da zanîn ku Hikûmeta Kantona Kobanê tevî Yekîtiya Şaredariyên Başûrê Rojhilatê Anatolyayê (GABB), partiyên siyasî yên Kurdistanî, sazî û dezgehên Kurdistanî biryar dane ku têkildarî xebatên ji nû ve avakirina Kobanê rojên 2-3’yê Gulanê li Amedê konferansekê li dar bixin.
Ji aliyê xwe ve hevşaredarê Bajarê Mezin ê Amedê Anli têkildarî armancên konferansê jî axivî û destnîşan kir ku, tenê deriyê Mûrşîtpinar li aliyê Tirkiyeyê ye vekirî û diyar kir ku ew li bendê ne ku dewleta Tirk vê xirbeyê bibîne û di çarçoveya mafê mirovan de pêngavan biavêje. Anli got ku wê pêngavekî wiha feydeyê bide çareseriya pirsgirêka Kurd jî.
Hate ragihandin ku konferansa ku dîroka wê ji aliyê Mislim ve hate aşkerakirin wê bi malovaniya Şaredariya Bajarê Mezin a Amedê, Odeya Nojdarên Amedê, Kongreya Jinên Azad (KJA), Odeya Mîmarên Amedê yên TMMOB’ê, Baroya Amedê û Komeleya Mafê Mirovan (ÎHD) bê lidarxistin.
PUKmedia