(Çar mirov bi agir şewitîn û mirim)
5-3-2015
Agir û agir em ê bighên jiyanê
Agir, berdewam e
Li keviyên mêlakan pêtên xwe diçêrîne
Hîn av ne afrandêr e
Sinbilên hêviyan di xewnên geniman de
Dimrin
Roj di azmanan werdibe
Bi ser me de dikeve
Hîn em dişewitin tev xewnên xwe
Pêtek ji sînema Amûdê
Ji bo me veşartibûn
Û bi ser me de kirin
Gelo çend buharên şewatê li hêviya me ne?
Çend zistanê birçîbûnê?
Çend payizên ji jiyan weşînê emê biweşin?
Amûdê ….!
Agir berdewam e
Ji dil davêje mêlakan
Ardû mirov in
Gelo Roj parî û çêniyên xwe davêje me?
Yan pêtî û rivînên Sînema şewitî ji me re hilanî bûn?
Ta kengî em ê bişewitin…eyyyyy Xwedanê Avê?
çi buharek xemgîn
Dîsa agir mirin
diyarî me kir
Avdar demsala mirina me ye
Me diva salek bê mirin di ser me re bibûre
Gelo çima her gav bi hev re em
Dimrin?
Geh bi avê
Geh bi agir
Geh li rê
Gelo çima av li agirê me nabe?
Dilê birîn bi buharekê şa nabe
Êdî birîn nema di dil hiltê
Çar hawêr bêna mirinê
Gelo çend keser ji dûûûûûr…dûr
Wê li ser te biqîrin…Amûdê
Gelo wê kî avê li kezebên şewitî bike?
Hinavên penaber û revyayên ji ber mirinê
Gelo wê kî xewnan bilorîne?
Xewnên zarokan li pey xwe hiştî
Li ber siya mirinê nivistî
Ax ax ax ..Amûdê
Çima mirinên te bi koman e
Bi qevdan e
Bi revdan e…
Wax wax wax…
Şermola mîna Ziyayê maran
Dikişkişe..dirêêêêêj dibe û vedzille
Mirovên bajêr yeko yeko
Deho deho dadqurtîne
Qey naweste?
Ranaweste?
Bûka mirinê Amûdê
Wê ji keserên kîjan penaberî re
Te bughêzin..
Em ê destên xwe li hev bidin û bêjin
Bû û çû
Çû û bû
Wey wax !
Ev mirin e mirin
Çûna bê veger e..bê veger
Mîna penaber û koçberên go te ew
ji ser çavên xwe qewrandin
û yên li pey xewn û keserên wan giriyan
te şewitandin
kom bi kom…Amûdê
komek şewitî
refek revyayî
her comerdiyek te şewatek e
her rȗmetiyek te şewatek e
loma agir di laşê te de berdewam e
di hinavên te de avahiyeke deh qonax e
ez zanim
pîvan û pêwanên şewat û agirên bi te ketî
mêraniya te ye
lehingiya te ye
ser bilindiya te ye
hêz û xurtiya dilên xort û keçên te ye
Amûdê..lêêêêêêê
Lê.
Burhan Hisso
5-3-2015