Sultan Temmo
pêwîstî bi binxistina şaristaniya Rojhilata Navîn heye“. Ji bo pêkanîna vê armancê misyon dane hêzên İslamî, ku ew bi xwe pêkhateyek bingehîn yên Rojhilata Navîn e, lê hêzên Rojavayî û di pişta wan de aqilmendên Mason yên navnetewî pir baş fayde ji naveroka İslamê ya hişk û sert dikin
Hêzên navnetewî yên komploger bi daxwaza perçekirina Rojhilata Navîn, hemû cûre lîstikên xwe pêş dixin. Di serdema Sedsala nû de biryar dane ku hevpeymana “Sykes Bîko” bi dawî bînin, êdî Rojhilata Navîn ji nû ve perçe bikin. Ev rêjîmên desthilatdar yên ku weke encama wê hevpeymanê derketine navê nikarin ji bercewendiyên hêzên navnetewî re bibin bersiv. Di dirêjahiya dîroka nûjen de gelek caran hêzên sermayedar yên Rojavayî destwerdana Rojhilata Navîn kirine ji bo pêkanîna bercewendiyên xwe, lê gelê Rojhilata Navîn baş tê negihiştiye bê ev bercewendî çi ne..
Her dem siyasetmedar û stratejîsyen, aborîzan , û nivîskaran bal kişandine ser bercewendiyên hêzên sermayedar yên Rojavayî di herema Rojhilata Navîn de, û ev yek bi Petrol û Zêr û Zîvên vê axê ve girê dane, ev tê wê wateyê ku tenê milê wê yê maddî dîtine û şirove kirine. Ji ber vê yekê herdem kêm mane û dijminê xwe baş nas nekirine û kaos jiyan kirine, weke ku em dizanin deriyê hemû rêjîmên Rojhilata Navîn ji karsazên Rojavayî re vekirî ne û rê ji Holdîng û Fabrîkayên wan re vekirî ne, hêzên Rojavayî çi bixwazin ji Rojhilata Navîn, pir bi hesan rêjîmên heremê yên weke xulam ji wan re dixebitin pêşkêş dikin, ev yek Petrol be yan jî çi zengîniyê ser erd û bin erdê heremê be, her çiqas rewş wiha be jî lê eşkereye ku bercewendiyên hêzên sermayedarên Rojavayî van tiştan derbas dikin û armanca wan ya sereke ne Petrol û ne Zêr û Zîvên heremê ye, armanca dawî û sereke ya van hêzên Rojavayî, şikandin û binxistina rihê Şaristaniya Rojhilata Navîn e, her wiha windakirina çand û dîroka pêkhateyên Rojhilata Navîn e, bi wateyekê zelal ew milên moral (manewî) yên gelên heremê ji xwe re kirine armanc.
Hêzên Rojavayî ku dixwazin şaristaniya Rojava, weke şaristaniya yekemîn di Cîhanê de bidin nîşandan, piştî lêkolîn û şopandinên bi deh salan gihiştine vê encamê:”Şaristaniya Rojava nabe şaristaniyek Gerdûnî, bi hebûna şaristaniya Rojhilata Navîn, pêwîstî bi binxistina şaristaniya Rojhilata Navîn heye”. Ji bo pêkanîna vê armancê misyon dane hêzên İslamî, ku ew bi xwe pêkhateyek bingehîn yên Rojhilata Navîn e, lê hêzên Rojavayî û di pişta wan de aqilmendên Mason yên navnetewî pir baş fayde ji naveroka İslamê ya hişk û sert dikin, ew baş nasdikin ku İslam ne tenê Ol û Bawerî ye, İslam bi sed sala weke sîstema dewlet hatiye bi rêvebirin, ji Emewiya bigre ta bighêje Osmanliya herdem İslam xwe berfereh kiriye û şer kiriye ji bo tenê rengê xwe belav bike, û baweriyên mîna Xristyan û Yehûdî û Zeredeştî derew derxistiye, û xwestiye çanda İslamî ya Ereb bike çanda desthilatdar ya Rojhilata Navîn, û çandên din yê cihê reng qebûl neke û red bike, di roja me ya niha de em rastî vejîneke pir bi xwîn ya tevgerên İslamî tên, heger hûn baş bişopînin; di hemû pevçûnên bi xwîn yên di Rojhilata Navîn de, şûna tevgerên İslamî tê de heye, ev yek ne rast lê hatineke. Hêzên Rojavayî bi zanebûn dest dirêjî nava van tevgeran dikin û wan ji bo armanca xwe ya sereke bi kar tînin, ji bo reşkirin û binxistina şaristaniya Rojhilata Navîn.
Çapa nûjen ya tevgerên İslamî, ku pir bi tundî derdikeve pêşberî me”Devleta Îslam ya Îraq û Şam”, bi kurt nivîsa (DAİŞ) weke tevgerekî, ku bi misyona çewtkirin û belavkirin û tunekirina şaristaniya Rojhilata Navîn radibe, ew weke nexweşiyekê ketiye laşê heremê de, weke jehrekê pir bi lez bi rih û moralê pêkhateyên Rojhilata Navîn de diçe, û ji xwe re Çand û dîroka hezaran salan yê gelê heremê armanc digre û dixwaze tune bike, pêxwasên çola û bêjiyên şaristaniya Rojava pir bi hovane êrîş dibin ser Bawerî û Çand û hebûna pêkhateyên Resen yên afrînerê şaristaniya Rojhilata Navîn, DAİŞ ne tenê hêzeke leşkerî ye, ew hêzeke bi Bername û Pîlan û Bawerî ye, hêzeke bi zanebûn hatiye amadekirin û xwedî misyoneke mezin e.
DAİŞ weke rêxistin, encamê inflasyona rêjîmên desthilatdar yên Rojhilata Navîn derdikeve pêşberî me, ev yek weke şensekî dîrokî li ser maseyekê zêrîn, ji hêzên Rojavayî re hate pêşkêşkirin û van hêzan jehra xwe berdan laş û mejiyên vê rêxiştinê, û ew serxweş xistin bi tundetûjiya bi xwîn ya baweriya İslamê, her wiha bûye weke navendek sîxurên hêzên Rojavayî û yên heremî, DAİŞ bûye weke Cenewarek ku hemû hêzên desthilatdar wê ji bo bercewendiyên xwe bi kar tînin, di serê van hêza de Amerîka û Awrûpa bi rêka vê rêxistinê, nava xwe ji mirov û komên İslamî yên tund paqij dikin, berê wan dan Rojhilata Navîn di bin navê Cîhadê, û her wiha bi rêka vê rêxistinê rengekî pir bi xwîn û nebaş û paşverû dide Ola İslamê, û hiştiye ku ola İslamê di navbera Misilmanan de bibe cihê guman û lêpirs û gengeşiyê, her wiha bi rêka DAİŞ, hêzên sermayedar yên Rojavayî, dixwazin Neqşe Rê ya Rojhilata Navîn ya mezin çê bikin li ser bingehê şerê navxweyî yên pêkhateyên Rojhilata Navîn, weke çawa bi xurtî agirê di navbera “ŞÎAA “û “SUNNA” gur dikin, her wiha çawa Xiristyanê Mûsilê hatin koçberkirin, û bi hovane êrîş birin ser Kurdên Êzîdî xwediyê dîroka 3 hezar sal, û 200 hezar Êzîdî koçber kirin, 3000 jinên Êzîdî ji xwe re birin( sebaya) li gorî ola islamê, 5000 êzîdî kuştin, her wiha li gelek cihên cuda li İraq û Sûrî pir wêneyên bi xwîn yê vê rêxistinê hene, ew xizmeta kûrkirina nakokiyên di navbera pêkhateyên Rojhilata Navîn dike, û şerê zengîntiya şaristaniyê dike û dixwaze tune bike, desthilatdarên heremê ji bo parastina desthilatdariya xwe ji vê rêxistinê Sûd werdigrin û berê wê didin milet û pêkhateyan, ev yek Îran dike, Sûrî dike, Tirkî dike, Qatar dike, Saûdî dike, Urdun dike, ji bo gurkirina agirê di navbera “ŞÎAA “û “SUNAA”, desteka maddî didan, her wiha dewleta Tirkî ku ew bi xwe mîrateyê impratoriya Osmanlî ya İslamî xwe dibîne pir bi xurtî piştgiriya DAİŞ kiriye beramberî hêzên azadîxwaz yên Kurd û ji DAÎŞ sûd wergirtiye, bila baş zanibe eger ew pêvajoya çareseriya demokratik û aşîtıyê bi Kurda re pêş de nebe, ewê di nava demeke ne dirêj de bi agirê DAÎŞ bişewite, û bila hemû hêzên ku piştgiriya DAÎŞ kiribin baş zanibin ku ew tenê dawî û hilweşandina xwe dereng dixin, ev agirê ku ew bi xwe gur dikin, bê çare ew wan dişewitîne û wê wan bişewitîne. DAÎŞ weke cenawerekî dev bixwîn êrîşî her kesî dike û artêşên rêjîmên Sûrî û Malikî bi bin dixe û pir bi hovane kuştinê dike û seriyan ji laşa vediqetîne û pesnê xwe bi vê yekê dide û li ser ragihandinê şerekî pir bi zanebûn û bi bandor dide meşandin, artêşên ku hejmarê wan sed hezaran derbas dikin li ber vê rêxistinê nikarin ber xwe bidin, artêşên xwedî top û tank û firok û mûşek nikarin xwe li ber vê rêxiştinê bigrin… Ev tê wateya ku ev rêjîm li hemberî vîrûsê DAÎŞ ne xwedî sîstemek parastinê ne….! Vîrûsê DAÎŞ pir bi hesan dikare laş û mejiyê wan perçe perçe bike, gelo çare çiye ji vê halê( nexweşiyek kevn ne diyar)….?
Weke hêza yekemîn ku şerê DAÎŞ kir, yekîneyên parastina gel bi kurtnivîsa “” YPG”” di roja me de weke hêza herî xurt ku beramberî DAÎŞ ber xwe dide û bê navber serkeftina bi dest dixe, yekîneyên parastina gel çi ye? Û hêza xwe ji çi digre…….? Her nexweşiyek dermanê wê heye, her jehrek tiryaqa wê heye… rêxistina DAÎŞ ku jehra perçekirin û tunekirina çand û şaristaniya Rojhilata Navîn berdide laş û mejiyê gelên heremê, û bi kiryarên dijmirovahî komkujiyan pêk tîne, tenê yek hêz dikare jê re bibe tiryaq û wê bê bandor bike û koka wê hişk bike. ev hêz yekîneyên parastina gelên Rojhilata Navîn e, ev hêz hêza xwe ji biratiya gelên Rojhilata Navîn digre, ji mafê xwe parastina cewherî digre, ji mozaik û zengîntî ya çandên Rojhilata Navîn digre, ji dergûşa mirovahî û biratî û şaristaniyê digre. “” YPG”” û “” HPG”” weke hêzên sereke ku li ser vê şopê dimeşin û xwedî ev raman û bawerî ne, eşkere ye ku “” YPG”” û “” HPG”” parêzvanên hemû nirx û bawerî û çand û dîroka Rojhilata Navînin bi hemû pêkhateyên xwe, “” YPG” û ” HPG” “di meydanên şer de, weke melkemotê DAÎŞ tên naskirin, bi hêzeke biçûk lê bi baweriyeke serkeftinê xurt şer dike, bi çekên leşkerî pir bi sînor lê bi moralekî bê sînor xwedî li nirxên gelan derdikevin, ev yek bi serê xwe tiryaqa DAÎŞ ê ye. Li Rojavayê Kurdistanê bi sadan xort û keçen Kurd, ereb, û xiristyan tevlî refê “” YPG” û ” HPG”” bûne û di fermana Şengalê de bi sedan xort û keçên Êzîdî tevlî refê “” YPG”” bûne û weke pêwîstiyeke bi lez yekîneyên berxwedana Şengalê “YBŞ” hate avakirin, nav çi dibe bila bibe, pir giring nîne..! ya bingehîn ew e li ser bingeha xwe parastina cewherî û di rêka biratî û yekîtiya gel û çandên Rojhilata Navîn de xwe bi rêxistin kirine.
Hemû gelên Rojhilata Navîn vê yekê baş nas bikin” Kurd, Ereb, Tirk, Firs, Asûrî, Ermenî, Suryanî” û her wiha hemû ol û baweriyên Rojhilata Navîn vê yekê nas bikin”Misilman, Xiristyan, Yehûdî, û Êzîdî”, vîrûsê DAÎŞ xwe li ser olperestî û netewperestiya me dide jiyankirin û bi vî awayî wê dawî li biratiya gelên Rojhilata Navîn bîne, û ew ê bibe ser sedema dijminatiya bi hezaren salan, hemû ol û bawerî û çand û netewên heremê vê yekê baş nas bikin û bibin xwediyê tiryaqa DAÎŞ ê û piştgiriyê bidin “” YPG” û ” HPG” ” li ser riya sazkirina hêza parastina Rojhilata Navîn.
TÊBÎNÎ: TİRYAQ . مضاد للسموم =
