Tiştê ku bala me di mehrecana çîroka kurdî de kişand, hatina siyasetmedar û serkirdeyê partiya Yekîtî li Sûriyê mamoste Ismaîl Hemê bû, ew ji rojên mehrecanê qut nebû, her car jî li heman cî rûdinişt, diyar dibû ku ew guhdanê bi wêjeya kurdî dike, ne tenê ev jî, di roja dawî de ku navê çîroka serkeftî wê bê diyarkirin, ji her kesî bêtir ew reht bû, bendewar bû, digot wê kengî nav ragihînin? Di ahenga roja dawî de ji mehrecanê hunermend Seed Ferso çend stiranên xweş gotin, yekser Ismaîl Hemê dengê wî bi dengê Seed Ferso re derket û vî tiştî hişt ku cemawerê amade jî dengê xwe pê re hildin û bi hev re stranan bêjin. Ji bo gelê me di Rojavayê Kurdistanê de kesayetiyên mîna Ismaîl Hemê di vê rewşê de pêwîst in, Malpera (Bûyerpress)çend pirs bi lez ji mamoste Ismaîl Hemê kirin..
– Mamoste hûn wek siysetmedar ku rewşa Sûriyayê û rojavayê kurdistanê dişopînin û karê we rojane ye, çi hişt Ismaîl Hemê vê mihrecana çîroka kurdî bişopîne ?
– Ji bilî siyasetê ez hinekî mijûl im bi wêjeyê, birastî wek ez pisporekî wêjeya inglîzî me, ez hinekî pêvajoya wêjaya kurdî dişopînim, kêfamin ji wêjeya kurdî re tê çi çîrok, çi roman û çi helbest, ez dişopînim, guhdana min ji zimanê kurdî re jî heye û gotarine minî siyasî bi zimanê kurdî hene. Ji mêj ve ez dinvîsim û ez wek kesayetiyek ji bilî siyasetê ez hinekî guh didim wêjeyê.
– Tu çawa vê festîvalê dinirxînî?
– Birastî ew festîvala kurteçîroka kurdî, ew bûyereke yekemîn car tiştek wiha em dibînin, tu dizanî festîvalên helbestê hene lê çîroka kurdî û nivîskar bi zimanê kurdî kurteçîrokê binivîsînin tiştekî gelek gining e, xelkên me, kesayetiyên me mijûl bûbûn bi zimanê erebî, pê dinivîsandin, em dixwazin ev xelkana derbasî zimanê kurdî bibin, zimanê kurdî zimanê wêjeyê ye, ji zimanê erebî ne kêmtir e, heger ez nebêjim bêtir, dikare bi hemî cureyên wêjeyê pêşbîniyê bide, ji ber ez dibînim zimanê kurdî ji berê ve zimanê wêjeyê ye.
– Wek te guhdar kir, tu asta çîroka kurdî bi zimanê kurdî çawa dibînî ?
– Çîroka kurdî di destpêkê de ye, gelek roman hene, derî vebûye, hîn hewildan in, ez nikarim bêjim kurteçîrokek kurdî ya nûjen çêbûye, hîn hewldan dibin ku ev rengê wêjeyî çihê xwe bigire.
– Ismaîl Hemê xwe bêtir di nav wêjeya kurdî de dibîne yan di nav siyasetê de?
– Rastî, ez siyasetmedar im, lê têkiliya min bi wêjeyê re kevn e, li ba min wêjeya kurdî balkêş bû û ji kevin de di warê guhdana min de bû çi roman, çi helbest û çi çîrok be.
– Sala bê, dibe ku Ismaîl hemê çîrokê binivîse û beşdar bibe?
– Na, ez niha ne amamde me ji tiştekî wiha re , lê di pêşerojê de, dibe.. ez nizanim.
– Vê carê -bê ku em bêjin siyasetmdar- nivîskar Ismaîl Hemê , zor spas.
– Spas ji we re.
