* Bo Bîranîna Sêyemîn ya Koҫkirina Helbestevan Emerê La`lê.
– Xem û xeyalên te ez revandim
Çol û bêlanan te ez gihandim
Ji ber te sotim te ez pijandim
Bayê evînya te ez hejandim
– Dildarê rûyê du singên te me
Bˈçeleng û çakî mêvanê te me
Ji ber fermana te heleste me
Sûnd bi serê te te ez helandim.
(Ji helbesta /Yara Pîroz/ Emerê La`lê /Rêncber/ ji dîwana wî /Xem û sawêr/).
– (Xem) jiyan û (xeyalên te) xewnên min (revandim) ji nişka ve, (Çol û bêlanan) bi tenê birim (gihandim) dûr kesek ji bilî min wan xewnan najî, te (sotim) bi evîna xwe, tu bi min dijî (te ez pijandim) mîna xwarin û nan, teqez (bayê evînya te) bandoriya te, ez (hejandim) binbandor kirim.
– Di vê helbestê de helbestevan bi tevayî tê revandin, ne wek carê hiş yan aqil tê revandin, di hevoka duyem de bireserê didiwan (çol û bêlan) hatiye pêş ji bo lihevkirina mûzîkê bi xêza yekê re û ji bo lêker jî li dawiyê tevgereke bandoriyê bike di navbera peyvok û guhdêr (tu û ez) de, liv bêhtir dibe bi du lêkeran di xêza siyem de û têkiliya (ez û tu) berdewam e, tevî ku (te) li pêş e, bi bandor e, (ez) li paş e, binbandor e, wêne jî tev kilasîk in, berê hatine bikaranîn, zelal û diyar in çimkî pêkhatên wan ji dorhêlî û cîwarê Kurdan in (çol û bêlan, sotin û pijandin, ba û hejandin).
– (Dildar) ne tenê tu min direvînî û disojî, ez jî evîndar im, (rûyê du singên te) çelengiya çiyayên te welato min dikşîne, ez im (mêvan) ê ji riya te dernakevim (bi çeleng û çakî), ji bo te tim amade me (heleste me), tiştek ji te buhatir tune ye ji sûndê re.
– Piştî ku helbestevan di malika pêşîn de, bê viyan û biryar bû, tenê xwe dihişt di destê yara pîroz (welat) de, di malika duyem de eşkere dike ku ew (dildar) e, ango xwe xwedî rol û bandor nîşan dide, lêker jî di dema bûrî de bûn lê di malika dudiwê de, di dema niho de ne, ev nîşan dide ku tevî hemî bîranînên bi êş, ew hîna dilsozê evîna xwe ye. Dîsan jî wê qada taybet ya (ez û tu) diparêze û tevî yar li vir welate jî, lê ew evîneke wijdanî tekane diyar dike û welat di wêneya yarekê de dibîne û dikare wî hestê netewî bigihîne evîneke şeydayî bêhempa.
