Bûyerpress
Rakan Şêxê
Piştî ku Napoleon Ewropa kontrol kir, biryara dagirkirina Rûsyayê da. Dema ku Napoleon ber bi Rûsyayê ve diçû di gelek bajar û gundên Ewropayê re derbas bû. Li wan gund û bajaran milet ji malên xwe derdiket, da ku bi dizî li karwanê Napoleonê Mezin temaşe bike. Dema Napoleon derbasî xaka Rûsyayê bû, rastî cotkarekî Rûsî hat ku dasik di destê wî de bû, û bi çalakî û bê westan paleya xwe dikir. KarwanêNapoleon qet bala wî cotkarî nekişand.
Napoleon ji pasvan û fermandarên artêşa xwe re got:
– Ma hûn vî cotkarê rûsî yê kotî dibînin? Li karwanê min temaşe nake.!
Her wiha got:
– We dît çawa keçên Ewropayê bi hewes ji odeyên xwe yên razanê derdiketin û li pêşiya malên xwe radiwestiyan ji bo ku li karwanê min temaşe bikin..?
Napoleon karwan rawestand û got:
– Vî cotkarî werînin bal min.
Cotkar destgirêdayî jê re anîn.
Napoleon gotê:
– Tu çima paleya xwe ranawestînî û li karwanê min temaşe nakî ?
Cotkar got:
– Ma min çi ji te û karwanê te ye, xemxwariya pêşîn li ba min xaka min e.
Napoleon got:
–Ma tu nizanî ez kî me?
Cotkar got:
– Tu çi kes bî li ba min ne girîng e.
Napoleon got:
– Divê tu bizanibî ku ez ê welatê te dagir bikim.
Cotkar lê vegerand:
– Tu dagirkerekî çepel û bêrûmet î. Tu qet nikarî welatê min dagir bikî.
Napoleon got:
– Divê tu navê min bi xwe re hilgirî, da ku ez her dem li bîra te bim…
Û ji leşkerê xwe re got:
– Navê min bi sîxekî sorkirî li ser destê wî binivîsin!.
Piştî wê kiryarê, cotkarê rûsî dasa xwe hilda û li destê daxdayî xist. Ew dest birrî û avêt nav leşker û efserên wî, û got:
– Ji te re navê xwe bi xwe re bibe. Şerm e ji min re ku ez navê êrîşkerekî bêrûmet î weke te hilgirim.
Napoleon li kesên derdora xwe nihêrî û ew peyva xwe ya navdar got:” Têkçûn ji vir dest pê dike”.
Bi rastî jî artêşa Napoleon li Rûsyayê, rastî têkşikandineke mezin hat.
Em jî dibêjin: Mirovê ku bi xaka xwe ve girêdayî be û jê hez bike, bê guman simbilê serkeftinê diçîne û tu carî nakeve.
Nivîsên ku tên weşandin, nerînên xudanên xwe ne.
Ev nivîs di rojnameya Bûyerpress, hejmara 75′ê de hatiye weşandin. 2018.3.1
