Helbestin Bijartî .. “Ehmedê Huseynî”

Posted By: qadiron: June 30, 2016In: Çand û HunerNo Comments

Print Email

DENG

Dengek tê guhê min..

Her şev

Her kêlîk

Tiştekî dibêje

Lê nizanim çi ye?

Pencereyên xewnê digirim..

Û xwe li hêviya

Semageriya agirê

xetîreyên azadiyê

Radigirim..

03.11.2015

BAGER

Bager..

Bi daran re dipeyive

Reşemarek hildiperike qurmê darê

Siwarek

Şopa hespê xwe wenda dike

Ez jî şopa kenê te

Di rêçên dilê xwe de nîgar dikim..

MIRIN

Li cihekî pîremêrek dimire..

Li cihekî din zarokek..

Di nav destên min de xewn

Û li ber çavên min

Evîna te!!

04.11.2015

BAJAR

Vê şevê

Bajarên te

Bi pêxemberên derewîn

hatine dorpêç kirin..

Peyvên pîroz li kolanan diherikin,

Bi dizî ji xwe re dibêjim:

Bêriya te dikim şaro!

Bi destên xwe keroşkên tirsê dikujim..

Şev dilerize,

Piyala min dilerize,

Sirûda jiyana min dilerize,

Û bi tenê

Li ber

Îstegeha jiyanê

Li hêviya tirêna hatina te me

Hey azadî…!

11.11.2015

DIÇIM

Diçim

Da ku têra xwe

Bi çolistanê re bipeyivim..

Diçim

Da ku di nav tozê de

Li bîranînên xwe bigerim..

Diçim

Da ku xwîna kewan

Ji ser zimanê Amûdê

Ji ser keviya kêlên gora diya xwe

vemalim..

Diçim

Da ku têra xwe

Di deftera evîna te de

Di bahoza birîna te de

Binalim…

Diçim

Da ku li wir

Wek şervanekî jibîrbûyî

Wek nehwirîneke serberdayî

Wek mirineke derengmayî

Bibarim…!

11.11.2015

QULING

Yê ku di dilê te de dijene

Ez im..

Yê ku li vir û li wir

Û li ser milê te

Bi bagerê re dikene

Ez im..

Dîsa jî

Qulingê li ber çavên te

Per şkestî

Bê war û bê cî

Pelekî ji darê ketî

Ez im..!

11.11.2015

JANÊ XELEF

Ji te re nabêjim

Bêrîkirinê

Çavlirêmanê

Dilê parçebûyî yê aşiqan

ji te re nabêjim..

sorgulê bêriya destê te kiriye

Azadiyê bêriya çavê te kiriye

Û jiyanê jî bêriya kenê te kiriye…!

Mehmûd Huseynî 1

Rêya di navbera me de vekirî ye

Mehmûdê mino!

Pencereya şînîgiriyê vedikim,

Dilê min

ber bi goristana Essenê ve difire!

Pencereya bêrîkirinê asê dikim

Xewna min

Li ber kêla te dimire!!

MEHMÛD Huseynî 2

Çavên ku reş bûn

Çavên ku şev bûn

Çavên ku halan bûn

Çavên ku dastan bûn

Çavên ku tu bûyî

Çavên ku ez bûm

Êdî di mirinê de

Ne amade ne..!!

Bi tenê

Ka bêje: çima rihê mino?!!

GULLE

Ew gulleya ku dihat

Û di sînga min de wenda dibû

Ji mirovan re digot:

Hin tişt hene

Şîrîn in

Û hin jî tal in

Wek mirinê!!!

GER

Li min bigerin!

Hûn ê min,

di dilê Kurdistanê de

kuştî bibînin!!

KEÇA MIN ÊVAR

Ji esmanan ta bi erdê

Ji deştê ta bi çiyê

Ji seferê ta bi Stokholmê

Ji mirinê ta bi Londonê

Ji tenhatiyê ta bi goristana Amûdê

Ji te hez dikim!!!

KURÊ MIN BAZYAR

Ji kîjan baranê dest bi hezkirina te bikim?

Ji kîjan hevîrî

Jiyanê li gor dilê te bisitirînim?

Ez ê ji bo te carekê bimirim

Dîsa jî ji bo te

Ez û çiyan şehîd dikevin!!!

DÛRKETIN

Ji dema ku dûrî te ketim

Ji dema ku ji çermê xwe derketim

Ji dema ku di bîra te de raketim

Ji dema ku hespên min

Ji Amedê

Hetanî bi Amûdê

Di xwînê de digevizîn

Çarenûsa min

Pênûsa min jî

LI VIR

Li vir,

Min her tişt ji bîr kir!

Min helbest

Sirûd

Hevalên mirî

Tembînameya bavê xwe

Min evîn jî ji bîr kir…

Li vir

Bi çavên xemgîn

Li bîranînan temaşa dikim..

Qamişlo

24.01.2016

RONDIK

Ji bîr neke

Tu gula hinarkên xwe

Bi rondikên min

av bidî!?

KEN

Nûçeyan ji min re nebêje!

Behsa welatan ji min re neke!

Gelo ez ê çawan çûkê dilê xwe

Di goristana kenê te de veşêrim?

BOTANÊ

Payzokên te

Xweşmêr û siwaran

Keviran

Helbest û dildaran

Bi girî vedikin

Botana minê!!!

Çemên sor diherikin

Sorgulên te

Li ser keviya dilê min

Dipişkivin..

Di destên te de axa helbestan

Di kezeba min de jî

Karwanên darbestan

BOTANÊ!!!

Bazbendên xwe bişewitîne!

Helbestên xwe bişewitîne!

Bawermendên xwe bişewitîne!

Û bi hibra xweliyê

Navê xwe li ser dilê min binivîsîne

Botanê!!

NISÊBÎNÊ

Ma dawiya vê bendewariyê nayê gelo?

Rengê axê xweşik e

Rengê reşgirêdana dayika min xweşiktir e

Û rengê şehîdan

xweşiktirîn reng e Nisêbîna minê!

Hey xwedayê min

Ma tu nabînî

Çawan di pîsîrên dayikan de

Şîr dimiçiqe!?

Ma zimanên ku êşa te

Ji neviyên me re bibêjin , hene

Nisêbîna rihê min!!?

KOBANÎ

Hin çîrok hene

Ne bi zimanê êşê be

Nayên gotin!!

Kobanî yek ji wan çîrokan e..

Li Kobaniyê

Pinpinîk bi gulleyan re,

Bager bi stiranan re,

Û helbest bi keviran re ,

dipeyivin!!

TU…!

Tu demsalên min

Yeko yeko ji xaniyê xewna min didizî!

Tu, di bêhûdeyiya rihê min de

radizî!

Tu li xetîreyên dilê min temaşa dikî

Û xwe ji ber tîna eşqa min vedidizî!!

BÊRÎ

Bêrîkirina xwe bi xwe re bîne

Berbiskên xwe jî bi xwe re bîne!

Sirûdên xwe di dilê min de

Biçîne..!!

Pencereyê veke û xewnan bibîne!

Baskên xwe veke û li bajarê min biçurise!

Û dema ku dahola cengê dest pê kir

Tiliyên xwe di şûna gulleyan de

Ji min re bişîne..!!

GUSTÎLK

Li paş wê darê

Şopa gavên te dibînim..

Li paş wê dara din

Bi kila çavê re dipeyivim..

Û li paş wî esmanê dûr

Gustîlka te

Di tiliya ewran de diçurise!!

PEL

Sosinên te li ber çavên min in

Şervanên te jî di xwîna min de rûdinin

Erê Rojavaya minê

Li qîrînên pelên darên giyanê te

Guhdarî dikim!!

GUL

Min gulek ji te re

Xiste guldankê

Û min ji te re got,

li vê qulê miqate be

Ev gul

gula şehîdên welatê min e..!

STÊRK

Îşev, bi hezaran esman
di stêrkên Nisêbînê de,
Bi hezaran goristan
Di laşê Qamişlokê de
dixuyin!!!

EFRÎN

Li ser dergehên êşa te

Navê din ê zeytûnê me

Li ser dergehên ava te

Rondikên rojê me..

Û di banga dilê te

Evîneke tijî azadî me

Efrîna minê!!

DU BAJAR

Vê şevê

Esmanê Qamişloyê

Stêrkên Qamişloyê

Bi nave Nisêbînê diçurisin!!!

ROJAVA…

Rojava,
zarotiya ku lêvên serav û serabê diçurisîne..
Rojava,
Kevala ku êşa min di rengê reş de dinimîne..
Rojava,
Toza ku li ber lingên birîndar nimêj dike..
Rojava,
Hinaseya ku di sînga şervanan de asê dimîne..
Rojava,
Demsalên ku destên xwe li alên azadiyê dipelînin..
Rojava,
Pirsên ku bersivên xwe bi kêrên babelîskan dikujin..
Rojava,
Dastanên ku bi ser serê xwedawendan de dirijin..
Rojava,
Xwîna rojê ya ku ber bi dilê berbangê de diherike..
Rojava,
Hîvên çardeşevî yên ku di esmanê xewna min de rûdinin..
Rojava,
De destên xwe vekin û pêşwaziya siwarên afsaneyê bikin!

09.06.2016

GAV

Di sînga xwe de
Pêjna gavên hilatina te
dibihîzîm
Hey Rojavayê!!!

TENÊ

Her roj darekê, bi navê te, di dilê Qamişloyê de diçinim..
Her roj, ewrekî ji refê xwe mayî, ber bi warên te ve dişînim..
Her roj, li ser ala şervanan, kenê te dinivîsînim..
Her roj, tu dibî azadî, ez jî bi tenê dimînim!!

14. 06.2016

DIL

wek ku tu çawan serê xwe ji rastiyê re dihejînî,

Wisa jî dilê xwe ji evîna min re

bihejîne!!

15.06. 2016

TU

Tu ximav û pênûsa destê Xanî yî
Tu keval û reng û neqşeya Manî yî
Tu hinaseya Selmaya Cizîrî yî
Tu av û rûbarên şewata Feqî yî
Tu Yelda yî, şevçiraya çavê Nalî yî
Tu Rojavaya min î,

dil û jiyana Huseynî yî..!

BENDEWARÎ

Di guhên min de

Xuşîna reşekirasê şeva Qamişloyê,

Di hestên min de,

Kurtepista bageran û darbestên rengîn,

Di çavên min de,

Ronahiya te

Ginijîna te

Krîstalên destên te

Hîva xemgîn a li ser zimanê te

Û di dilê min de jî