Rêyên şaş, Ramanên şaş, Em hiştin li paş.
Dema mirov bixwaze tiştekî zanibe divê bipirse û dibe mirov wê pirsê ji xwe bike! Loma divê em ji xwe bipirsin ferman çi ye? Çi bi xwe re tîne û çi li şûn xwe dihêle? Ferman yanî tinekirina ji hemû tiştî. Bi xwe re Kînê, xwînê û bêtifaqiyê tîne û van tova li şûna xwe diçîne û dihêle….
Gelo gelê Kurd yê ku îro Êzîdiyann qebûl nake weke Êzîdî, evneqebûlkirin ji ku hat û ev gel ji ku hat?
Gelo, heke li vir em bibêjin Kurdên ne Êzîdî ji 74 fermanan afirîn yan bibêjin berhemê 74 fermanan e, em şaş in?
Mendê War
Bersiv: na ye, ji ber hemû ferman û êrîş yên hatîne ser gelê Êzîdî ji ber olê hatîne ser, û Êzîdiyan her tim li ber xwe daye, serê xwe daye û sira xwe nedaye, ev Kurdên ne Êzîdî îro, ev ne Êzîdî ne yên ku nikarin hemû tiştê xwe ji fermana xelas kin û biparêzin, lê tiştê ji wan hatin parastîne weke: Ziman, Çand, Keltûr, Hunera xwe û deng û rengê xwe parastîne! Lê ola xwe neparastîne, neku ne parastî ne ji destdayîna bi devê şûr û tifinga, û bi ji destdana olê jî ne felitîne, li bin zilm û zordariyê de hatîne teptepandin û lorandin, ji bo qet çavên xwe venekin û li şûna xwe li xwe neftilin û li xwe nenêrin. Zarokên wan jî bi fitwat û ayatên kerb û kînê hatîne perwerdekirin û rêya xwe-înkarkirinê û hevneqebûlkirinê dayne ber. Ev şagirtên wan îro derçûne û netewîtiyê nadin pêş û xwe nabînin deyndarên netew û ola xwe ya kevnar, lê xwe dibînin mirîd û deyndar yên wê rêya ku dijmin ew danîne ser, loma jî îro Êzîdiyan weke bingeha xwe qebûl nakin, ne ku Êzîdiyan qebûl nakin, xwe înkar dikin, û xwe qebûl nakin, ji ber heta anha negihiştîne wê astê ku karibin mejiyê xwe ji qirêja dijmin bişon û vê rastiyê jî qebûl nakin….
Li vir pirsa ku ji xwe diafire dibeje: Gelî Kurdan, eger rast e hûn Kurdistanê dixwazin û hûn zanin Kurdistan li ser bingeha netewî tê avakirin û netew hemû Kurdan di mala Kurdî de digehîne hev,Kurdên ( Sinî , Elewî , Êzîdî û…..) çima hûn giringiyê bi netewê nadin û bi yekîtî hûn dirba fermanan nagirin?.
Hinek Kurd dibêjin Misilmantî weke çêlê havînê ye pir germe û mirovan dişewitîne! Lê çima ew Kurd naçin bin siha kepira bapîrê xwe ya xwezayî û di bin de li xwe û xwîşk û birayên xwe nagerîn? Ji ber îro jî yên ku xwe dibînin rêber û serwer ên milet rêwiyên wê rêya me behskirî ne, loma rê nadin ku kes here ber neynikê, xwe bibîne ji bo xwe nas neke. Ev yek tinekirina take kesa dûrxistina ji netew û rastiya wan, tinekirina civakê bi xwe ye. Nexşeyên di nexşan de ,Perçeyên di perça de, Sayks Pîkoyên li sayks Pîkwa de, Kurdistan û Ferman bi destê dijmin Perçe kirin û hûrkirina perça bi destê min û te…. Sayks Pîko Kurdistan kire çar perçe û her perçeyek da dev hovekî ji yên ku dinanên xwe li kezeba mirovan tûj dike. Lê ne tenê Kurdistan perçe kir, kezeba Rojhilata Navîn perçe kir, û bi perçekirinê re bihdera felsefe û zanînê belav kir, û ji ne lihevkirina gelên heremê re tewand, lê ji her gelî zêdetir Kurdan li ber wê tewandinê re stra. Kurd bi hev re kirin pale û cotarên rez û baxên bêtifaqiyê, perçebûna Kurdan a di mala Kurdî de ne bes bû, ji hev jî hatin cûdakirin û bûne ” Weke noka li kevir ketî”, bûn ” Mîh bi piyê xwe û bizin bi piyê xwe” û ” Her kes û emelê xwe”.
Li ser vî asasî Kurdan tevger kir, û bûne xwedan part û tevger. Di nav çar perçan de çend peymanên Kurdî hatine dayin?
Gelo peymanên partiyên Kurdan ne hemû kopiyên peymana Sayks Pîko ne di mala Kurdî de?
Gelo herdu cihên bilind yên biriyara Hewlêr û Qendîl nebûyne Sayks û Pîko û Kurdistanê ji bo berjewendiyên xwe û partiyên xwe perçe dikin?
Heke kurmê darê ne ji darê bê dar xerab nabe û heke îro ne ji partiyên Kurdan ba wê Kurdistan di hindirwê xwe de ne perçe ba. Em her tim behsa fermana dikin û bi vê gotinê re em kuştin û rev û talankirinê tînin ber çavên xwe, heke em li rewşa Kurdistanê û tevgera partiyên siyasî yên Kurdî binêrin, çawa bi dijberî û rikmane li himberî hev deyne, ma ji fermanan û pê ve em dikarin çi navî lê bikin, ji xwe ferman û talan û malwêraniya mezin bêtifaqî û neyekrêziya navmala Kurdî ye.
Weke stranekê ketiye ser zimanê Kurdan, her kes ji xwe re dibeje Sayks Pîko Kurdistan kire çar perçe û li ser çar dewletan dabeş kir. Rast e bi vî awayî dibejin û bê wate. li dûr dinêrin, lê li nêzîk nanêrin, li perçeyên di perçan de nanêrin û nabêjin kê perçe perçe kirine ?.
Heke îro Kurd yekbana, yek perçe, yek fikir û dil, yek armanc û dest, nuha li her çar perçan xwedan maf û desthelat bûna, û her tiştê wan li destê wan de bû, wan xwe bi xwe bi rê ve dibir. Heke nuha deriyên sînora di destê wan de ban, mîna deriyê Birahîm Xelîl li nava Bakûr û Başûr û deriyên din, li nava Bakûr û Rojava, Rojava û Başûr, Başûr û Rojhelat , Rojhelat û Bakûr wê çi wateya sînora heba, û wê çi wateya perçeya heba….. Heta perçe ji mejiyê Kurdan ranebin wê têl û sînor hebin.
Helbestvan dibeje: Sînorên li serê me de ji yên dijmin danî mêstir in. Bi tenê ev semede ku em ji her gelî bêhêztir in. Dibeje sînorên ku me li nava xwe de danîn ji yên ku dijmin danî mêstir in, bi tenê ev neyekîtiya me, me bê hêz dike di cîhanê de. Mînakên herî zelal Şingal û Rojava, li himber dijminê ku bûye tirs û kabûs ji cîhanê re keç û xortên Kurd li Rojavayê Kurdistanê bi canfidayî li ber xwe didin, dest danaynin û axa xwe diparêzin! Li Şingalê jî heman tişt nuha hêzên Kurdî şer dikin li himber dijminê xwînxwar! Lê partiyên Kurdan îro li ber çavên wî dijminî şerê hev dikin û dijminên gelê Kurd ji wan re kefa dikutin. Li nav gund û kolanên Kurdan dijmin cirîda dikin û li aliyê din dost û cînarên Kurda yên bi dev, sînariyoya şerê birakujiya Kurdan hazir dikin, û Kurd jî di mala xwe de ketîne xirecirê, meşq û rahênanan dikin û bi gef û awiran dinana rayî yek dikin, û dibejin em amadekariya dewleta Kurdî dikin. Lê çi amadekariya dikin?
Li her çar perçan PKK û alîgirên wê amadekariya dewleteke Apoçî dikin û ji fikirê xwe û pê ve qebûl nakin, Kurd be, ne kurd be, eger vî fikirî qebûl bike ew yê rast e, lê egere qebûl neke ew xayîn e, Li cem wan kîjan partiyê, serokî, yan kes, duh çi kirbe û îro çi bike ji bo Kurdistanê nayê ber çavê wan, û bi dîtina wan ne ji bo Kurdîniyê ye. weke asasgirtin, bi yek fikirî û bi yek ramanê dimeşin û bang li hemû Kurdan dikin; werin em bi hev re ji bo Kurdistana mezin kar bikin, dema ku yek were û bixwaze bi hev re kar bikin dibejin kerem bike ha ji te re (GPS) fikirê APO û bimeşe, yan erê yan na, fikirê hevbeş nayê qebûlkirin. Her weha li her çar perçeyan û bi taybet li Başûrê Kurdistanê PDK jî her roj dibeje em ê dewleta Kurdî ragehînin, lê wê jî pala xwe daye kapîtalizmiyê û destê xwe daye hemû dijminên Kurd û Kurdistanê û pişta xwe bi vî awayî girêdide, ew jî ji xwe û pê ve qebûl neke dixwaze dewleteke Berzanî ava bike û bi hukmekî malbatî bibe xwedan desthelat û xwedana Kurdistanê, çi Kurdê li dervey yasayên wê tev bigere dibeje dijmin e û metirsî ye ji bo ewlekariya netewî.
Bi vî awayî amadekariya dewleta Kurdî têye kirin. Kurd bûne meşkên li destê dijmina, dijmin bi wan agirê bê xelatî û bêtifaqiyê gur û geş dikin…. Ev hemû berhemê fermana ye. Bi yekîtiyê rê li ferman û pîlanan tê girtin. Bi yekîtiyê Kurdistan tê avakirin. Bi yekîtiyê sînor radibin… Bijî Yekîtî.
Ev gotar di hejmara (44)an ya rojnameya “Buyerpress“de, hatiye weşandin 1-6-2016
