Zilamê herî dirêj ê cîhanê, Sultan Kosen ragihand ku hevjîna wî ya berî çend rojan ji bo şîna apê xwe çûbû bajarê Qamişlo yê Rojavayê Kurdistanê ji ber girtîbûna deriyê sînor nikare vegere. Kosen ji waliyê Mêrdînê alîkarî xwest.
Xortê kurd ê bi navê Sultan Kosen, ku bi bejna xwe ya 2.51 metre wek zilamê herî dirêj ê cîhanê ketiye pirtûka rekoran a Guinessê, Cotmeha par bi keça ji Rojavayê Kurdistanê ya bi navê Merwe re zewicîbû.
Sultan Kosen, îro got ku hevjîna wî nêzîkî 2 hefteyan berê ji bona şîna apê xwe çûye bajarê Qamişlo lê dema xwestiye vegere deriyê sînorî yê navbera Qamişlo û Nisêbînê girtîbû lewma nekariye vegere.
Kosen, ji waliyê Mêrdînê Mustefa Taşkesan xwest alîkarî wî bike da ku hevjîna wî vegere mal çimkî ew nikare bê wê bijî.
Hat zanîn, waliyê Mêrdînê jî soza alîkariyê daye Sultan Kosen.
Jêder:RÛDAW
