Ferhad Içmo
Serokên min ka sozên we
Li Dihok û li Hewlêrê
Ne we tîrkir ne we rihnkir
Em man berxê li ber kêrê
Nej dilê xwe ez dibêjim
Peymana we li ser xêrê
Niza çima kerwanê we
Tim vedgere ji nîvê rê
***
Serokên min em Kurd yekin
Lê win tîş û rêz û bendin
Li rojava kî baş zane
Wek partiya ka hûn çendin
We rojên me kirin wek hev
Şev û sibeh bê elendin
Li ser masên xwaringeha
Li ûtêlan hûn lewendin
*****************
Serokên min hûn dikenin
Lê em digrîn ji azara
Wey mixabin win têrnabin
Ji xwêdan û hêsrên jara
Jîr û gernas tev windabûn
Bi dûrketin ji şûnwara
Serokên min we weşandin
Gul û kulîlk ji ser dara
***
Serokên min em tev dîlin
Me nefroşin bi erzanî
Win rêzanin win serwerin
Milet pûçbû ji xizanî
Ji peyvên we em bêzarbûn
Win pirr dûrin ji Berzanî
Serokên min ji bo kursî
We em kujtin neb nezanî
****************
Serokên min bo me bêjin
Kanî warên bav û kala
Rêbaza we gund û bajar
Kirin wêran hiştin vala
Em windabûn em riswabûn
Di nav pêlên nav û ala
Piştî xwenên li ser çiya
Em bûn xwînî di newala
***
Serokên min em tev zanin
Bo xwenên xwe hûn nûnerin
Li ser darên paşerojê
Hûn pelik û şaxên zerin
Li birîn û êşa merda
Bi çavên xwe hûn nanerin
Serokên min di rojên teng
Hûn tev lal û kor û kerrin
***
Serokên min hûn nabhîzin
Qîr û nalên dîl û jara
Serokên min hûn nabînin
Hêsrên çavên dost û yara
Li şarên me ciwan kêmbûn
Tev koçberbûn ji van wara
Serokên min em li pey we
Ketin rêza tawanbara
****************
Serokên min di nav wede
Kanî dengê nifşê ciwan
We em kirin ref û kerî
Bi dûrketin ji nav kerwan
We ew ji hev belavkirin
Ne şivan man ne jî serwan
Bûn xerîbên şaristana
Bê nal mane hespên rehwan
***************
Serokên min ma pêşmerge
Û ( YPG) hûn nabînin
Vaye dara yekîtiyê
Li Kobanî tev diçînin
Ji bo Kurda tev yek canin
Yek rewanin tev yek xwînin
Ji bo roka azadiyê
Xwîna pîroz dibarînin
***
Nû min naskir em li jînê
Bê rêzan û bê serokin
Ji bo xelkê li ezmana
Hûn sitêr û heyv û rokin
Lê em darin bi biryarin
Xwedî alin bi dîrokin
Em dastanin em efsanin
Li cîhanê em çîrokin
>>>>>>>>>>>>>>>>>>>>>>>>
Serokên min birro pêde
Em di gel we xweş hevalin
Lê di şevê em ji ber we
Dikin qêrîn tim dinalin
Gelo raste em nexweşin
An hestên me pîr û kalin
Sed mixabin peyvên tazî
Bi we tûj û tirş û talin
***
Serokên min we kar – nekir
Ji bo Kurd û Kurdistanê
We agirek germ daneda
Berî serma zivistanê
Welatê me we kir taxek
Ji taxikên goristanê
Hûn dilketin kurs`yên kurmî
Li nav tingên kursîstanê
***
Serokên min hûn dibêjin
Li nav Kurda ka tu kîye
Partiya min zor mezine
Partya gellê bê partiye
Miletê min xak perwere
Daxwaza wî yekîtiye
Li jînek pak hîn digere
Hêviya wî tim rastiye
***
Heta mirnê ku ez bêjim
Rista min bi dawî nayê
Êşên sala ez didêrim
Wek perrîka li ber bayê
Hêviya min penabere
Omîda min ketye tayê
Serokên min li min negrin
Pênûs bê min çû semayê
-Tîbînê: Helbest wek gihiştî destê me hatiye weşandin.
-Ev helbest di hejmara(12)an, ji Rojnameya “Bûyerpress” de hatiye weşandin.