بورتريه فشة خلق بيشمركة روجآفا.. معادلة مستحيلة الحل

زاوية يكتبها الكاتب: حسن اسماعيل لصحيفة Bûyerpress

بالتأكيد القصة صارت تشبه حكايات ألف ليلة وليلة والست شهرزاد كل يوم بتروي حوادث وحكايات وتلهي مولانا شهريار عن أمر السياف مسرور. ثلاث سنوات والناس عم تحكي وتروي قصص وحكايات عن الجنود والبشمركة والضباط والمغاوير وجماعة تحكي وصلوا للحدود وجماعة بتقول اليوم رح يدخلوا وجماعة تحلف ألف يمين بأنهم دخلوا وانتشروا بين الناس ومنتظرين ساعة الصفر وبالنهاية حبايبنا بالمجلس الموقر اتخذوا القرار المناسب.

يا أخي التبني حرام بالدين الحنيف ولذلك رح تكون البيشمركة جزء من قوات المجلس الوطني الكردي، بس لليوم ما عرفت أي قوات قصدهم يعني معقول يكون عند مجلسنا الكردي فيالق وجحافل وجيوش جرارة ورح تطلع بالوقت والمكان المناسب وتاكل الأخضر واليابس وتنضم لصفوفها هالمجموعة  وخاصة تصريحات الكولونيل بريمو في أربيل ودراساته الاستراعسكرية في تكوين الجيوش القومية وبنائها عقائديا، معقول هالقبضاي يترأس االقيادة والأركان ويرسم الخطط الاستراتيجية لحماية اقليم كردستان سورية بمعاونة الخبير في التسليح الجنرال فيصل اسماعيل والمارشال عربو صاحب نظرية الأرض إلنا، شي غريب عجيب كل هالجيوش والقادة والمجالس وأكراد سورية خايفين والله ما معهم حق لأني بتذكر تأكيدات صديقي المناضل مصطفى جمعة قبل سنتين بأن تحت راية الآزادي /16/ ألف مقاتل هاد قبل المؤتمر التوحيدي والحزب الموحد، يعني برأيكم اليوم غير ربنا ما يعرف العدد والعتاد.!؟

أوعى تخافوا حبايبي الأمانة بأيادي أمينة وما عنا غير مشكلة صغيرة وهي حردة التقدمي ربنا يهديهم  بس والله معهم حق جماعة البارتي التهموا المجلس وجبة دسمة مع طبق شهي من البيشمركة وبرعاية مدير الصالة اليكيتي.

الطرف الآخر أكيد حاسبها صح وخاصة الجماعة كانتون مؤسسات والجنرال صاروخان عم يقود الدفاع بحزم وخبرة ومستحيل يسمح بأي كردي يقاتل خارج منظومة قوات حماية الشعب والأقليات، صاحبنا عامل وكالة حصرية لسوتورو وموتورو والصناديد والعبابيد والبركان والزلزال … كلمة حق البيشمركة لازم تفوت عن طريق  السوق السوداء أو امتياز من شي جبهة.

طبعا الفتوى التي أصدرها الخبير القانوني ومنظر العقد الاجتماعي ورئيس المجلس واضحة وصريحة … مستحيل الشباب يسمحوا بهدر الدم الكردي ودخول قوة ثانية رح تكون قنبلة موقوتة،  لذلك يجب الحفاظ على الدم الكردي وصيانته من خلال الجيش الواحد والحزب الواحد والزوجة الواحدة وربنا يبارك بأخوة السلاح من سائر الطوائف والمذاهب والآثنيات. والأهم الزوجة لأن التعدد سجن وغرامة وخراب بيوت … ربنا يستر

أتمنى أخوتي نتذكر إشارة الشهادة والنصر في مسرح روما العظيمة لرئيس كانتون كوباني وقائدة القوات الكردية أمام المحاربين والمجالدين الرومان … سمعت بأن سبارتاكوس العظيم مع آلاف المجالدين رح يشاركونا تحرير روجآفا وروجهلات وشنكال والمريخ والزهرة وتحت مسمى قوات حماية وحدة الشعوب والكواكب … المشكلة الجماعة ما لحقوا ينقذوا كوباني من المجزرة.

وضعنا صعب وجرحنا عم ينزف واليوم كوباني والحسكة وتل ابيض، بكرة ديرك وعامودة وقامشلو، وكلمة حق إذا ما كنا أخوة و جبهة وحدة رح تتكرر مجزرة كوباني بكل جسم كردستان سورية يوم بعد يوم  إذا ما كنا روح وجسد واحد رح نموت ورح تموت أحلامنا.

نشر في صحيفة Bûyerpress في العدد 23 بتاريخ 2015/7/15